《低壓槽》影評︰吃力不討好

《低壓槽》係張家輝第三套導演作品,今次做埋編劇、導演同男主角。其實之前睇trailer見到流流地嘅CG特技,已經為呢套戲嘅質素感到有啲擔心,而嗰句「我懷念罪犯嘅味道」對白,令小弟有少少驚成套戲啲對白會唔會真係咁「作狀」。而好可惜,我睇呢套戲嘅擔憂,喺電影開播時一一發生咗…

開頭張家輝喺非洲自我放逐嗰part,到咗佢遇見隻野獸就變到好兒戲,見到隻野獸的特技令到小弟睇到好出戲。再加埋家輝當時「霸氣」演釋,成件事錯哂。之後家輝回憶自己當時做緊臥底扮苗僑偉(嗌四條煙嗰個)手下,苗僑偉講咗段對白話自己身世,再表達對自己身處嘅孤城睇法,我完全唔覺得係一位撈黑嘅大佬講出嚟。過咗一段時間,張家輝同三哥(苗僑偉)去洗衣鋪同林雪講數,林雪對三哥對手戲可圈可點,林雪嗰段好搶戲,雖然佢對三哥講數係會令人睇到有少少一頭霧水。最後雙方發生槍戰,張家輝同幕後一齊拍嘅動作場面幾好睇,但係三哥同林雪喺之後劇情唔會出現。而三哥呢條線俾小弟一個感覺,似係格硬整一場槍戰,再同觀眾講吓張家輝以前做臥底嘅內心掙扎同對執行正義嘅疑惑,只係手法唔算好。

中間家輝混入元華去餐廳綁個細路女,從而接近成套戲嘅幕後黑手「老闆」,嗰度出現咗小弟最憎嘅情節。元華成班人完全唔知細路女背後有幾多人馬保護佢,跟住元華家輝班賊匪俾人圍攻。元華嘅死實在令小弟忍唔住講咗句粗口,有乜理由你去打劫唔將自己手機較咗做震機,仲因為咁暴露埋自己位置。跟住小弟唔可以再抱住認真嘅態度去睇,套戲劇情細節做得太過求其。之後離開餐廳有段車輛追逐場面,拍得唔太好,大廈佈景做得唔太真實令人投入唔到個氣氛。嗰位被家輝綁咗嘅細路女演技…實在令人無言而對。兜兜轉轉家輝終於搵到「老闆」真正身份,男主角喺老闆嘅大廈同佢手下槍戰令我諗起The dark knight最後大廈嘅動作場面,當然比唔上The dark knight,而最後張家輝走得甩拍得好兒戲。劇情之後急轉直下,一連串行動之後家輝終於捉到「老闆」,而老闆對家輝嘅獨白…對白又係寫得好作狀,似想學Sin City但係有形無神。而老闆最後下場實在令小弟睇得好尷尬,即使後來有交待老闆身體狀況都兜唔到一眾角色嘅行為。

低壓槽實在令小弟感到可惜,有幾場槍戰拍得好緊張,尤其係大廈嗰段。但係劇本同細節係成套低壓槽嘅硬傷,可能張家輝野心過大未能駕馭咁嘅題材。另外提提,低壓槽鏡頭以及色調感覺好似睇緊Sin City,雖然張家輝未咁徹底將套戲以全黑白拍攝。張家輝做男主角感覺可圈可點,似係俾自己劇本拖累個演釋。最好戲嘅角色係喺前段直至洗衣店嘅林雪同張繼聰,兩位算係本色演出,可惜因為劇情關係無太大發揮機會。其他演員做得麻麻地,而配樂叫做普通。

總括而言,如果你忍得到低壓槽劇情犯駁嘅話,套戲叫做睇得過,今次張家輝拍得認真麻麻地。

這是粗人敵卡的電影推薦文章

作者: 粗人敵卡

一個要將別人忽視的事寫出來的九十後寫手,閒時看電影、讀小說、聽音樂等等,夢想做一個通俗小說作家

電影圈Facebook專頁

Facebook By Weblizar Powered By Weblizar
About 粗人敵卡 3 Articles
一個要將別人忽視的事寫出來的九十後寫手,閒時看電影、讀小說、聽音樂等等,夢想做一個通俗小說作家