《死侍》喺死侍嘅世界,壞人就該死

死侍講得啱,今集的確係套家庭電影

故事開宗明義話你知係個學做爸爸嘅故事(不斷強調家庭亦取自狂野時速,哈)。雖然係部顛覆英雄嘅電影,但一樣將重要嘅信息擺喺片頭。

係,就係狼人。
死侍一開頭就話你知佢要同狼人比,話係因佢本來都係個打不死嘅英雄而喺戲入面死左所以自己都要死一次,但電影黎講想比嘅,係兩個英雄初為人父上面嘅學習。

仲好記得一年前睇《盧根》果時嘅感動,未遇到狼女羅拉之前,盧根嘅人生目標就係保護教授同時避免佢帶俾人傷害,佢大概以為自己餘生會做嘅只剩番呢件事,邊有諗過會多左個女俾佢照顧?
死侍呢?記唔記得個的士佬羨慕佢乜,又打得又有索女冧,同盧根處境好唔同,佢正值人生高峰,如果有埋家庭,就係人生贏家,不過…

對於死侍嘅悲痛,雖然全片都睇到我笑唔停,但就無可能忽略佢果句:有個要為我條女嘅死負責嘅人無死到,我殺唔到佢,thats me…

一點即到,點到即止,死侍好睇嘅地方係,佢寫一個悲劇英雄但本色不離風趣幽默,係收放自如,嚴肅同輕鬆完美平衡到(唔似雷神)。

喺女朋友話同佢組織家庭果時,佢怕自己唔會係個好爸爸,但喺佢人生已經無晒目標果時,偏偏就遇到個死仔。同《盧根》相似嘅係,兩個小朋友都等緊人拯救,兩個爸爸又都願意為小朋友犧牲,你問我?我會話呢啲叫父愛,滅霸果啲?

最後,姑勿論死侍係咪真係做左人爸爸,但佢真係因為小朋友成為左更好嘅人,身邊仲多左班屋企人,真係戥佢開心。

講多少少,喺死侍嘅世界,壞人就該死。好多人以為,善惡好難分,但好多時一個人是好是壞根本一眼就知,唔識分嘅反而係法律,所以話法律一視同仁(除左窮人)。所以睇住死侍殺人,不多說廢話咁殺,多說廢話咁殺;轟住音樂咁殺,slow motion咁殺;瀟灑俐落咁殺,自殺式咁殺,係一種快樂,雖然只係笑一陣,但呢下開懷只有死侍俾到。

呢套絕對係年度最歡樂電影(正過復3),係傷心良藥。朋友話見有人睇完喊悶,真係想學死侍咁回一句,悶你老味!

 

想睇多d電影推薦?快d follow電影圈 fb啦~

retro

作者: 謝信的藝文空間

music and book
歡迎你的一曲一詞、一字一句

電影圈Facebook專頁

Facebook By Weblizar Powered By Weblizar
retro
About 謝信的藝文空間 52 Articles
music and book 歡迎你的一曲一詞、一字一句