《無聲絕境》所謂驚嚇我都已經得啖笑

坦白話俾大家知,我諗左好耐應該點去形容呢部戲,最後發現只可以用四個字去形容而呢四個係咩字喺最後會話俾大家知。

分享套戲之前首先都想問下大家係抱住咩心情/心理準備入場(唔係一定要有),即係當一般爆谷片於是揸住爆谷入場定凝神戒備當十足驚嚇片還是輕輕鬆鬆當勵志睇人絕境生存?

喺入場前如果話我知你係第一種,我實答你睇戲死遠啲,咪俾我撞到你,但完場後如果我知你係呢種反而真心恭喜你(原因一陣講)。

如果係第二種,咁作為觀眾嘅你就好緊要喇,因為套戲target嘅正正係你呢類觀眾,不過當中至少又分為熱中於受驚嚇同只想間中俾小心臓體會下離心力兩種。
而如果你係前者咁金翅就PK鳥,完場相信只會同我一樣得番篇文最後四個字,但如果係後者,我真係要恭喜你呀,套戲係為你地度身訂造架!

如果你好衰唔衰係想睇人求生當勵志片睇…我老吹架啫,應該無呢類人嘅…

咁入正題講下套戲喇,先講讚嘅地方先啦(套戲至今咁多正評,實要趁墟讚下先嘅)
唔使多講,主題骨鋼同音效係賣得好嘅,
點好唔囉嗦喇(有眼見有耳聽啦),而個人最欣賞嘅位有兩個。

一就係片頭大約五分鐘嘅全部時間(到仔死喺橋上為止),認真個頭係開得靚嘅,show晒啲重要信息仲有起伏有鋪排,睇完係會令人對套戲當場專注幾分又投入幾分,期望又高幾分。
二就係兩父子喺瀑布之下呀爸教識個仔克服恐懼,呢幕somehow我腦海入面係同玻璃城堡兩父女夜晚喺沙漠入面對住虛空大嗌重疊左,而小朋友嘅成長入面,克服內心嘅恐懼係好重要一環,呢方面兩位爸爸都做得好好。

然後,就出事了。
同啲朋友一齊入場嘅我完場後講嘅第一個key word係多餘,套戲好多嘢多餘左,以致成套戲都喺度畫蛇添足畫到一個程度係無故事無劇情完全得番short by short嘅疑似驚嚇,係疑似!

雖然我唔知大家係咪都覺得好睇,但我知一套戲會好睇,就會有一定程度上嘅合理(The room呢啲千年難得一見唔計啦),但呢套戲係愈睇愈多黑人問號,而且啲問號根本都係多餘架!

問號一,為乜又生仔?
我嘗試答自己,因為一開頭嘅失去而寄出喺父母嘅補償心態加上新生嬰兒代表希望,即係話呢個家庭從來無放棄過希望!

問號二,大肚婆拎住重嘢上樓梯棘住嘢會死扯?
即係正常人都會試下就下位先嘛…
呢個位除左為突出口釘都唔知為乜,而重點其實係突出口釘都唔知為乜…唉

問號三,呀爸走出地窂竟然無發現浴缸水浸?
呀爸關心則亂啫關心則亂啫。
咁又好放心喺地窂照顧BB同老婆…

其實黎到呢度,佢後面啲所謂驚嚇我都已經得啖笑,可惜導演似乎覺得未玩夠,仲要為左有個勝利結局而安排明明好聰明嘅呀女聰明到熄左部耳機,明明最有技能求生嘅呀爸要白白犧牲,成件事愈拍愈老土,個氣氛愈後愈番返轉頭。

其實完場之後啲朋友都同我一樣係不吐不快,話到明要靜嘅一套戲,結果拍出黎真係笑又唔係喊又唔係,我寧願當初買爆谷入去睇,起碼全程可以有嘢咬下唔使咁谷住谷住咬牙切齒。

總之總括黎講,除非你就係只想間中俾小心臓體會下離心力果類觀眾,唔係你一定似我咁超乎所望地大失所望,用四個字形容係年度神級伏片(年度多餘左,sor..)

retro

作者: 謝信的藝文空間

music and book
歡迎你的一曲一詞、一字一句

電影圈Facebook專頁

Facebook By Weblizar Powered By Weblizar
retro
About 謝信的藝文空間 54 Articles
music and book 歡迎你的一曲一詞、一字一句