《打死不離三兄弟》其實打死不離三兄弟好睇喺邊?

成三個鐘嘅故事主要用左兩條線穿插去講,主線係兩個白痴去揾藍丘,中間不斷插敘三個人大學時期嘅同窗生活。

故事發展嘅方向當然係慢慢慢慢話你知,兩個白痴點解咁緊張要揾番藍丘,點解佢地會有段咁深厚嘅友情,藍丘到底係個點嘅人。

然後電影嘅信息就透過故事,透過幾個家庭嘅核心情況發放出黎,首先一定係戲入面一直擔任敘述嘅法罕,佢嘅故事同夢想有關;然後到拉加,佢屋企主要就係窮,有個垂死嘅老豆,自己係成家人嘅希望,令佢做咩都放鬆唔到;仲有藍丘個情人即係院長一家,集中描寫院長嘅教育方法。
於是乎三個鐘就講晒夢想、親情、教育三個大題。

但主軸係咩呢?電影09年首先喺印度上映,兩年後喺中港台公映隨即風靡三地,震撼教育界,其時學術界亦議論紛紛,相關嘅文章如雨後春筍,我就白痴咁喺9年後當飾演主角嘅印度劉華憑《打死不離歌聲夢》再次激勵人心先識揾番黎睇(買dvd),所以電影好多元素已經唔使重提,佢帶出嘅影響亦有目共睹。

自己睇呢套戲最深刻嘅一句對白就係當第一個學生喺校內自殺身亡之後,喪禮舉行之時,藍丘淋住雨咁行埋院長身邊同佢講果番精神壓力嘅說話。其實就指出一個問題,學生自殺,校長使唔使負責。如果將條問題擺喺現實對照一下,過去兩年,香港已經有近百個學生自殺,即係話大約會有番咁多個校長要受質疑,佢地使唔使為呢啲人命負責。換個講法,近年香港年輕人嘅自殺率上升(據16年統計每10萬就有9個),政府係咪都要為呢個數字負責?推而廣之,香港近年接連出現嘅學運社運,當中造成嘅個人傷亡(包括警民)及案件,政府係咪都要負責?

即係一個執勤警員喺衝突當中俾磚頭扔中,除左扔磚頭嘅人要負責,係咪可以顧慮到一啲導致市民長期精神受壓情緒不穩而失去一時判斷或自制能力嘅因素即係政府失效嘅施政失德嘅態度失常嘅回應同徹底背信棄義嘅針對性嘅有預謀嘅出賣香港同打擊壓迫市民嘅行為,簡單黎講,一個警員喺衝突中受傷,最先要質疑嘅,唔係應該係我地個政府?

嗯,《三兄弟》呢套戲當然唔係講公義,《給我一個道歉》先係。但呢套戲係講勇氣。由藍丘第一次拍住自己心口念念有詞重複好事來好事來呢下,成個設計就好似一個掣,教大家每當面對恐懼就㩒下呢個掣同自己講面對佢唔好避,就好似家輝句怯就輸一世。因為勇氣,藍丘表白;因為勇氣,法罕同呀爸和好並得到祝福向夢想出發;因為勇氣拉加唔再迷信,活出真我,之前幾個人各自面對嘅百般問題最終因為勇氣揾到出路,鼓勵大家夠勇係電影嘅主軸。

印度有好多社會問題,阿米爾·罕不厭其煩逐部作品去講,而佢首先想俾大家睇嘅,係勇氣嘅示範,所有社會問題一定都係複雜嘅,要改變一定唔係短時間,但憑咩可以去同難題搏鬥憑咩可以同麻煩對峙憑咩可以冷靜踏出第一步而且係決定性嘅一步?

呢個城市最近嘅愁雲慘淡令我成日諗起一段歌詞

是你
伸手拉我高飛 到高空最高點 再掉下這地
然後我
高聲講我非貪生怕死
可惜見不到轉機 只得忐忑的心 永遠傷悲

若被傷害夠,我想知大家有無勇氣用用一對手痛快的割開昨日詛咒

retro

作者: 謝信的藝文空間

music and book
歡迎你的一曲一詞、一字一句

電影圈Facebook專頁

Facebook By Weblizar Powered By Weblizar
retro
About 謝信的藝文空間 54 Articles
music and book 歡迎你的一曲一詞、一字一句