預咗比人屌:容我逆流彈一下《逆流大叔》

無可否認,無論響選題、製造話題、引起觀眾共同價值共鳴呢幾方面都相當之成功,雖然呢條橋唔係未用過(例如《十年》、《踏血尋梅》、《狂舞派》、《點五步》都係),但《逆流大叔》的確係有其獨到之處:例如用香港味十足嘅龍舟做主題,卻又唔主打青少年熱血,反而係Sell中佬情懷再加上少少《Shall we dance》嘅變奏(同樣係面對中年危機、響廁所練習同潘燦良余香凝果段單戀都好似),然後再加上黃德斌、吳震宇同潘燦良都各自發揮出水準(胡子彤都係好,但差半班),呢套戲其實點都有好多人會Buy。

問題係上述嘅「優點」並唔會掩飾倒套戲拍得好粗嘅事實,而呢個亦係一連串「本土電影」製作一直解決唔倒嘅死症:好多時觀眾唔係察覺唔倒,只係覺得「啱Feel」先係最重要考慮因素,質素參差反而可以接受。咁對呢啲以「本土」賣點嘅製作人黎講,自然亦「順應民意」將大部份心力擺響搞本土Gimmick方面,一啲電影嘅基本要求卻得過且過。

《逆流大叔》第一個大問題係個劇本太冗贅:除咗龍舟比賽呢條主線,四個男主角又各有一條愛情線,男主角任職間公司又有一條職場線。然後都仲未計佢地彼此之間嘅友情戲份,同埋各式各樣嘅本土花絮要滲入去──短短兩個鐘頭唔夠,邊講倒咁多內容?然後仲有人話呢套戲個劇本係「近年完成度最高」,大佬呀,唔係塞得夠多嘢入去套戲就叫「完成度高」架!

結果樣樣嘢咪寫得唔夠深入囉:例如吳鎮宇潘燦良同余香凝個衝突求撚其用句:「唔係未試過就放棄咁衰仔下話!」就輕輕帶過;吳鎮宇借借下錢胡定欣個女又話唔駛讀書一下就無厘頭完咗。龍舟隊被解散輕輕帶過就算,完全展現唔倒果種失落感;黃德斌條感情線一味死推,觀眾都未消化得哂就同老婆好番……但最誇張都係解散咗隊龍舟隊主角自行參賽,編劇都仲要硬塞條罷工線入去黎個左膠大翻身!即係還掂都開咗個煲煲湯,塞多兩隻蛋順便烚埋佢咁樣樣?拍戲唔得咁架。

喂,上面每一條線其實都係要時間去比演員發揮,一係你就將套戲拍多大半個鐘,唔係就好應該響劇本終審時做取捨去蕪存菁,編劇同導演都太貪心最後無做個功夫,其實呢樣先至係「劇本完成度不足」嘅問題呀!

另一個問題係好多「本土」電影成日出現嘅,就係成套戲不停重覆本土本土本土本土,慌死你唔知咁:點解以前港產片唔會講本土兩個字?因為本身拍嘅嘢就係本土,觀眾Get倒家嘛!但《逆流大叔》就係成套片不停插入KOL呀、南亞裔炒黃牛飛呀、大陸新娘呀+小妹妹講普通話呀,唔係話講呢啲唔得(其實我都將比較好笑果啲部份剔除唔提),但駛唔駛疲勞轟炸到連黃德斌去同情敵對質都要加句「六七千蚊只能住劏房」、吳鎮宇同條女終於住埋一齊又要整個代理加多句「業主話要加兩千唔係就退訂」?

《逆流大叔》令我有種唔舒服嘅感覺係全程賣弄一種好刻意好出、「畫公仔畫出腸」嘅表達手法,你話如果用響舞台劇呢啲場景有局限嘅地方我係覺得適當,但電影拍攝其實係可以有好多比較含蓄嘅手法展現出黎,何必句句都要講到出口餵到入口?

跟住要講到成套戲最大嘅一個問題:就係龍舟競賽本身。正如頭先所講,因為劇情擠塞太嚴重,所以有關龍舟比賽嘅內容其實描述唔多:真正重點戲份大概只有一段衝線戲同一段爬頭戲,至於龍舟最重要嘅合作部份,又只靠余香凝一句「龍舟最緊要有節奏」輕輕帶過(但部戲最大問題偏偏就係節奏掌握唔好)。

其實龍舟最大特色係乜?就係一兩條友划得快係無用,係要全體統一先可以贏,但《逆流大叔》入面扒龍舟班友入面,來來去去都係講四個男主角一個女主角,其他全部都係佈景板茄喱啡,然後有人同我講「睇倒入面有Team work好感動」,無撚嘢下話?定係你以為個比賽叫「五人龍舟賽」定係你嘅Team Work都自以為有合作,其實都只係睇倒自己?

當然你可以反駁話「你都識講太多劇情啦,唔通個個隊員都要有段戲牙」,但至少係唔係每個隊員都可以出個名呀?係咪除咗傳話之外,攝一兩個鏡比人知道佢地唔係佈景版,而係有血有肉嘅隊友真係咁難呀?即係一套講合作競技嘅電影竟然係可以完全忽略隊友嘅存在,我諗呢個真係終極諷刺。

至於演員,吳鎮宇同埋黃德斌呢對《爆裂刑警》組合相隔多年,吳鎮宇當然係繼續有影帝級表現;但黃德斌同以前個恐怖份子look相比,就堅係進步到令人嚇親勒,果場廁所喊戲真係令人嘆為觀止。至於潘燦良雖然都係演得好,但果種舞台劇味道仍然好重,成日都覺得佢好似好用力演戲,胡子彤就叫OK啦。

問題係響班女角上面。作為女主角余香凝,響呢套戲嘅演技真係叫一般(客氣Mode),無論劇情激唔激動佢都係一個樣,聲亦係先天所限爭啲:老實講佢之所以討好,都係因為樣靚身裁正。至於其餘幾個女角,除咗胡定欣有多少發揮,其餘都係戲份不足。特別係條o靚妹,戲份唔少,有人話佢演得好,但我覺得演得實在係……廢事比人屌,講到呢度算。讚佢地演得果啲「影評」,唔知係咪又…….x撚咗。

好多人話睇完《逆流大叔》好感動,咁我都有兩個位係幾感動嘅,一個就係吳鎮宇同潘燦良第一次落水划舟,划下划下突然覺得好過癮──有時一班麻甩佬無撚聊之下決定一齊搞啲嘢,搞下搞下搵倒樂趣所在呢種感覺真係好正。

仲有就係吳鎮宇同胡定欣一段情,好多時就係咁,你以為對條女天上有地下無地好,十幾萬幫佢去借面不改容,但最尾呢?可能只係當你嘅努力同空氣無分別;你以為努力終於換倒佢少少感動,但現實就係話你聽無撚用架,佢唔屌番你持住呢啲嘢「情緒勒索」佢經已叫好,根本響好多港女心中,犧牲,係不值一提。

然而呢兩點感動,都未至於令我對套戲改觀,始終拍得粗糙就係粗糙,果啲所謂中佬情懷、本土情意結並不足以彌補。當然今時今日呢個世界係有好多爛片,但唔係因為咁導演拍得衰觀眾就要將就──如果係咁,同飯民只要撐民主,就點偷懶做得點衰都可以原諒含撚有乜分別?

有時睇啲電影,明明就好唔對你胃口,但因為基本功夫做得好,令你好難話佢係一套爛片;但偏偏香港而家啲本土電影卻係向另一個極端發展,拍得爛,但就用「本土」兩個字靠你腦補Ignore哂啲缺點,然後就一定要狂讚佢好嘢,否則就係「政治唔正確」,好似《十年》同《棟篤特工》咁,講句拍得爛都要被批鬥。我彈佢比人屌唔緊要,最弊就係排山倒海咁讚,令呢班導演覺得拍爛啲係無問題,最緊要「本土」兩個字夠搶Gimmick夠綽,咁香港電影,就真係可以講「玩完」兩個字。

 

這是無神論者巴別塔的香港電影評論,喜歡請讚好﹗

retro

作者: 無神論者的巴別塔

博客地址:https://www.facebook.com/henryporterbabel/

電影圈Facebook專頁

Facebook By Weblizar Powered By Weblizar
retro
作者 無神論者的巴別塔 32 篇文章
博客地址:https://www.facebook.com/henryporterbabel/